الشعور بالنقص او اني اقل من غيري

الدونية (كأني مليش محل بينهن- زي الي حاطيني تحت- انا اقل - انا بسواش - انا صفر - ما الي مكان او مكانة) 

الدونية تمثل شعور بالفراغ والضياع ونابعة اكيد من المقارنات اللانهائية يلي منساويها بيننا وبين نفسنا. هو موضوع المقارنات شيء طبيعي وانبنى عند الانسان حتى يقدر يكمّل حياته في صراع البقاء وعشان يقيّم ذاته وادائه, كان هدف المقارنات اقارن مين اقوى مني, مين اخطر الي عشان انقذ نفسي من مخاطر معينة, لكن اليوم المقارنات عم بتسبب للفرد انه يشعر بعدم وجود هدف واضح أو معنى في حياته فبيوصل بينه وبين نفسه لضياع معيّن وقلة حيلة وبعدش يتقدم بسهولة. ناهيك عن المجتمع الحديث يلي بيتأثر الأفراد بتوقعات المجتمع وضغوطه، والاكثر الثقافة الرقمية والتواصل الاجتماعي أدى إلى زيادة الضغط على الأفراد لتحقيق النجاح وتحقيق التوازن في حياتهم. رح اعطيكو مثال: البنت يلي ما بتقدملها شب بتصير تفكر ليش ما بتقدملي اي حدا؟ وغير انها بتعمل مقارنات بينها وبين كل الصبايا الي بتعرفهن. والاصعب اذا هي بينها وبين حالها عم تقنع نفسها انه ما حدا عم بتقدملها لأنها عايشة ببيئة صعبة, لانه عيلتها الموسعة عليهن سمعة معينة, لانه هي من بيت فقير, لانه هي مش جذابة كفاية.

طيب شو منقدر نعمل مع الموضوع؟ رح اعطي بس شغلتين لانه الموضوع كبير

1. * التواصل الداخلي: اكتشاف الذات من اول وجديد وكسر هاي المعتقدات - اكثر اشي بحب اعمله مع متدربيني اني اسألهن عن من بيئتك في ناس زيك بس مع هيك قدروا يرتبطوا؟ ينجحوا؟ معناه القصص الي بتحكيها لحالك مش مزبوطة ولا هي عبارى عن الحقيقة المطلقة!

   * تحديد الأهداف: انك تحط هدف واضح لنفسك, وتسأل وتكون حقيقي: شو بدي انا بالزبط وكيف بقدر اكمل عشان اصل الهدف؟ لانه اهدافنا كبشر مختلفة وما بيعني اذا شخص جاب سيارة فخمة احس انه هو احسن مني لانه يمكن السيارة هي معيار نجاح للمجتمع بس مش معيار نجاح الك, فلما بتعرف انت شو بدك وشو هدف هيك بتحط انت معاييرك الخاصة وبتقلل مقارنة نفسك مع غيرك.

أنا هنا لمساعدتكم في رحلتكم نحو استعادة الهدف والمعنى في حياتكم وكسر هاي المعتقدات وفهم اعمق لشو عم يخليكو واقفين محلكو. إذا بدكو تكملو متابعة نصائح واستراتيجيات تطوير الذات تابعوا حسابي على وسائل التواصل الاجتماعي وكونوا جزء من مجتمع يسعى للنمو والتحسين المستمر او تواصلوا معي لبدء سيرورة تدريب وتطوير ذاتي.

دمتم بخير وبإيجابية،

محبتي اوريانا- مرافقة لتحويل الفوضى الداخلية الى هدوء نفسي.